مبطي بياض السّنا بالبرق ماشفته
متى نشوفه يشعشع داخل الغيمه
عز الله إن السنا بالزين وصفته
لاشفت ضوح السنا هلت معه ديمه
الحب طول وانا يا اهل الهوا عفته
خلاص ماللمحبه عندنا قيمه
وش عاد لو سيد الغزلان صادفته
سعيت له بالوفا والطيب والشيمه
من طافني مقصده في مقصدي طفته
وش عاد لو مقصده زلت مراسيمه
اللي يبي مصدر التكليف كلفته
والحب هذي مع العالم مقاسيمه
ياطول موضوعي اللي فيه ولفته
كنه خرز سبحة قمنا بتنظيمه
انا رهين الغرام العام ماعفته
واليوم عفته وقدم في مقاديمه
كد قلت له غاذي الشريان نشفته
والقلب عيا يسيح البال من ضيمه
صحيح راع الردى تنباع معرفته
تنباع مانشتريها بارخص القيمه
والقلب من حبه اللي صار نظفته
واقول انا كل ابو طقه بتعليمه
